នាព្រឹកថ្ងៃអង្គារ ទី៣០ ខែសីហា ឆ្នាំ ២០២២ ស្ថិតនៅសាលាឃុំកំពង់អុស ស្រុកជលគិរី ខេត្តកំពង់ឆ្នាំង ឯកឧត្តម អ៊ឹង លាងហ៊ួ សមាជិកគណ:កម្មការទី៧ ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៧ បានអញ្ជើញជួបសំណេះសំណាល ពាំនាំនូវប្រសាសន៍សាកសួរសុខទុក្ខ និងថ្លែងអំណរគុណ របស់សម្ដចវិបុលសេនាភក្ដីប្រធានព្រឹទ្ធសភា ជាមួយក្រុមប្រឹក្សាឃុំកំពង់អុស ស្មៀនឃុំ ប្រធានប៉ុស្តិ៍រដ្ឋបាលឃុំ និងប្រធានភូមិទាំង០៥ ក្នុងឃុំ។ បន្ទាប់ពីបានស្ដាប់របាយការណ៍ពីសភាពការណ៍ទូទៅ រួចមក ឯកឧត្តមបានសម្តែងការកោតសរសើរ ចំពោះកិច្ចខិតខំបំពេញភារកិច្ចលេចចេញស្នាដៃជាច្រើនក្នុងការដោះ ស្រាយសំណូមពរ និងតម្រូវការប្រជាពលរដ្ឋ របស់ក្រុមប្រឹក្សាឃុំ និងបានសំណូមពរសុំឲ្យមានការប្រែប្រួលថ្មីៗថែមទៀត បន្តខិតខំផ្ដល់សេវាជូនប្រជាពលរដ្ឋឲ្យបានឆាប់ទាន់ពេល រក្សាសាមគ្គីភាពឯកភាព អនុវត្តការងារតាមបទបញ្ជាផ្ទៃក្នុង តាមច្បាប់ ស្ដីពីការគ្រប់គ្រងរដ្ឋបាលឃុំ-សង្កាត់ ក្ដាប់ និងដោះស្រាយសភាពការណ៍ ឬសុំយោបល់ថ្នាក់លើ និងអនុវត្តរបបរាយការណ៍ឲ្យបានទៀងទាត់។ អនុវត្តគោលនយោបាយភូមិ-ឃុំ មានសុវត្ថិភាពឲ្យទទួលបានលទ្ធផលល្អ បន្ដដោះស្រាយទំនាស់ក្រៅប្រព័ន្ធតុលាការឲ្យសះជា ជូនប្រជាពលរដ្ឋឲ្យលោកស្ងប់ចិត្ត ជម្រុញការងារធ្វើអត្តសញ្ញាណប័ណ្ណជូនប្រជាពលរដ្ឋនិងផ្សព្វផ្សាយជូនប្រជាពលរដ្ឋឱ្យទៅចាក់វ៉ាក់សាំងការពារជំងឺកូវីដ-១៩ ទាំងដូសដូលដ្ឋាន និងដូសជំរុញ ការរស់នៅតាមគន្លងថ្មី ដោយរៀបចំបរិស្ថាន អនាម័យ បរិភោគស្អាត និងពិសារទឹកឆ្អិន។ ចុងបញ្ចប់ ឯកឧត្តមបានឧបត្ថម្ភថវិកាមួយចំនួនជូនដល់អ្នកចូលរួម និងថវិកាសម្រាប់មូលនិធិសង្គហធម៌ឃុំផងដែរ។